Transparenca e pamjaftueshme e Komunës së Prizrenit në ndarjen e subvencioneve për OJQ-të dhe individët në lëmitë e kulturës, rinisë dhe sporteve po vazhdon të brengos aktivistët e shoqërisë civile, pikëpamjet e të cilëve rreth kësaj çështjeje janë paraqitur edhe në mbledhjen e fundit të Komitetit për Komunitete, ku ka raportuar drejtori i Kulturës, Rinisë dhe Sporteve, Adem Morina. Në këtë takim janë shpalosur edhe shqetësimet e aktivistëve të komuniteteve jo-shumicë lidhur me mos përkrahjen financiare të aktiviteteve në nivel lokal për shënimin e ditëve memoriale, derisa janë kërkuar edhe sqarime për projektet e caktuara që janë iniciuar dhe ende nuk kanë përfunduar, sikurse edhe nevoja për përkrahjen e rinisë. 

Drejtori për Kulturë, Rini dhe Sporte, Adem Morina para anëtarëve të Komitetit për Komunitete të Kuvendit të Komunës së Prizrenit si dhe aktivistëve të shoqërisë civile ka raportuar për punën e deritanishme, duke theksuar realizimin e projekteve e aktiviteteve të ndryshme. Po ashtu ka informuar të pranishmit me rrjedhën e deritanishme të investimeve në përmirësimin e infrastrukturës në tri lëmitë që mbulon dikasteri i tij, por edhe për procesin e administrimit të ndarjes së subvencioneve për OJQ-të e individët. 

Pikërisht çështja e subvencioneve ka ngjallur debat, duke sjellë në vëmendje sërish kërkesën për shtimin e transparencës, por edhe monitorimin e projekteve që përkrahen nga buxheti komunal. 

Kërkesat për monitorim dhe transparencë të duhur 

Kryesuesi i Komitetit për Komunitete, Ertan Simitçi, ka thënë se bazuar në disa informata nga terreni, supozohet se në Komunën e Prizrenit janë rreth 400 OJQ, por se nuk ka informata të mjaftueshme për veprimtarinë e tyre. “Nuk kemi informata të sakta lidhur me kryesinë e OJQ-ve, menaxhimin apo raportimin, apo aktivitetet a po realizohen sipas kërkesave apo sipas thirrjeve publike”, ka deklaruar Simitçi, duke sugjeruar që regjistrimi i OJQ-ve me informatat e nevojshme të realizohet në platformat online të Komunës, bashkë me raportet përkatëse për punët e kryera me përkrahjen nga fondet publike. 

Drejtori Morina ka pranuar se monitorimi i projekteve të OJQ-ve që subvencionohen nga Komuna, nuk po mund të realizohet në mënyrën e duhur, për shkak se DKRS-ja nuk ka staf të mjaftueshëm. 

 “Është sugjerim me vend ngaqë ka më shumë se 250 organizata jo-qeveritare që janë përfituese të granteve nga Komuna e Prizrenit dhe si të monitorohen këto OJQ është sinqerisht e pamundur, ngaqë nuk kemi staf. Sipas organogramit të DKRS-së, po planifikojmë që ti kemi edhe tre monitorues për secilin dikaster, për ti monitoruar projektet që mbështeten nga DKRS”, ka thënë Morina.  

Ndërsa aktivistja e shoqërisë civile, Tringa Kasemi ka thënë se DKRS-ja e Komuna e kanë obligim që të përmirësojnë transparencën lidhur me subvencionimin e OJQ-ve e individëve, ngase ky ka qenë edhe premtim parazgjedhor. Ajo ka theksuar se Komuna duhet të ofrojë më shumë informata për mënyrën se si janë përzgjedhur përfituesit, pastaj të publikojë shumën e përkrahjes për secilën OJQ e secilin individ, si edhe të publikojë emrat e anëtarëve të Komisionit, të cilët kanë vlerësuar projekt propozimet. Kasemi ka vlerësuar se qytetarët nënçmohen me mos publikimin e emrave të Komisionit. 

“Komplet procesi është jo transparent, dhe po kërkojmë transparencë”, ka thënë ajo. 

Drejtori Morina është përgjigjur se shpallja e listës së përfituesve është bërë në përputhje me rregulloren përkatëse, dhe ka ofruar gatishmërinë që të gjitha informatat e kërkuara ti ofrojë përmes kërkesës për qasje në dokumente publike.  

“Me rregullore nuk po lejohet që të del shifra për secilën OJQ”, ka thënë Morina, duke pohuar se për këtë çështje është konsultuar edhe me zyrtarët ligjorë brenda Komunës së Prizrenit. 

Vërejtjet e pjesëtarëve të komuniteteve 

Përpos çështjes së administrimit të subvencioneve, anëtarët e Komitetit nga radhët e komuniteteve, por edhe aktivistët kanë paraqitur kërkesat që edhe niveli lokal të mbështesë shënimin e ditëve memoriale të komuniteteve. 

Anëtari i këtij Komiteti, Gani Elshani ka shprehur vërejtjen se drejtori i DKRS-së në raportimin e tij nuk ka përmendur aktivitetet e komuniteteve jo-shumicë. Ai ka pohuar se për manifestimin e ditës memoriale të ashkalive, sikurse edhe për manifestimin e ditës memoriale të romëve janë dërguar kërkesa për mbështetje financiare në Komunë. “Por këto kërkesa tona nuk marrin përgjigje nga DKRS-ja e rrjedhimisht as buxhet”, ka thënë Elshani.  

Edhe Fatmir Menekshe nga OJQ “Durmish Asllano” ka përkujtuar se Prizrenit veçohet për përbërjen e tij shumetnike dhe se shënimi i ditëve memorialë duhet të jetë në agjendën e qeverisë komunale. 

Drejtori Morina ka shpjeguar se kërkesat e komuniteteve jo-shumicë trajtohen në mënyrë të barabartë me ato të komunitetit shumicë dhe se njëjtë aprovohen sipas mundësive e prioriteteve. Në të njëjtën kohë ka shtuar se shoqatat kulturore, rinore e sportive të komuniteteve jo-shumicë nuk anashkalohen në manifestimet e organizuara nga Komuna. Sipas tij përfitues të subvencioneve janë edhe projektet e OJQ-ve e individëve nga radhët e komunitetit jo-shumicë.  

Ndërkaq anëtarja e Komitetit nga radhët e KDTP-së turke, Sevil Kazaz ka kërkuar sqarime lidhur me fatin e deritanishëm të projektit për ndërtimin e Qendrës Kulturore Turke. 

Kreu i DKRS-së ka sqaruar se si pasojë e ankesave në procesin e prokurimit publik lënda është dërguar në Organin Shqyrtues të Prokurimit dhe se Komuna pret përgjigjen e këtij organi. 

Sektori i rinisë me mangësi

Brengë tjetër e ngritur në këtë takim, ka qenë edhe mungesa e qendrës rinore, si dhe menaxhimi i qendrës kulturore në lagjen “Ortakoll”. 

Anëtari i Komitetit nga radhët e LDK-së, Marin Përgjoka ka kërkuar shpjegime lidhur me mënyrën e menaxhimit e shfrytëzimit të kësaj qendre. 

Aktivistja e shoqërisë civile, Linda Simitçiu ka theksuar mungesën e zyrtarit për Rini në DKRS, ngjashëm sikurse edhe aktivistja tjetër, Erolina Morina, e cila në të njëjtën kohë ka bërë thirrje për krijimin e një kodi të veçantë buxhetor për rininë, sikurse edhe shtimin e bashkëpunimit me shoqërinë civile në fushat e veprimtarisë së DKRS-së.    

Drejtori Morina ka theksuar se qendra në “Ortakoll” do të jetë në shërbim të shoqatave rinore e kulturore, dhe se me funksionalizimin e qendrës kulturore boshnjake do të krijohen hapësira shtesë për shoqatat kulturore. Sipas tij po shqyrtohen mundësitë edhe për krijimin e Qendrës Rinore në bashkëpunim me MKRS-në e Zyrën e BE-së. Mungesën e zyrtarit për Rini e ka pranuar si mangësi, dhe ka shtuar se kërkesa është dërguar në Zyrën e Personelit për plotësimin e këtij vendi të punës. 

Raportimi i drejtorëve në Komitetin për Komunitete të Kuvendit të Komunës së Prizrenit tashmë po bëhet një praktikë e rregullt. Para drejtorit Morina, në këtë organ kanë raportuar edhe drejtori i Administratës, Edin Shehu, si dhe drejtoresha e Arsimit, Luljeta Veselaj-Gutaj. 

© PRIZMA MEDIUM

“Ky shkrim përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC), Suedia dhe Qeveria e Dukatit të Madh të Luksemburgut.”